Cine, teatru y TV

Syntexto Teatro lleva la obra «Oh 36!» a Uviéu

Lluis Portal.

La compañía Syntexto Teatro va representar la obra Oh 36!, de Lluis Portal Hevia, el xueves 11 de marzu (20:00 hores) nel Teatru Filarmónica, dientro del Festival de Teatru Amateur que se ta celebrando estos meses na capital asturiana.

La trama d’esta obra inspírase na esperencia real vivida pol médicu y escritor asturianu Carlos de la Concha (Villaviciosa 1877 - Xixón 1965) cuando la Guerra Civil española. Al empezar el conflictu, el personaxe decide escondese nun abellugu, fechu baxo’l suelu del propiu pisu onde vivía, pa que nun lu garraren presu. El so rival más directu, l'anarquista Cristóbal Cano, acude con frecuencia a so casa cola intención de sorprendelu, lo que nun llegaría a ocurrir gracies a les precauciones tomaes pol doctor, la so familia y el serviciu de la casa. Les vivencies de los meses que duró esti particular destierru –como él lu llamaba–, plasmóla nun diariu bien interesante, detalláu y mui revelador, escritu en versu, que permanez inéditu setenta años depués. Esta obra, anque atropa munchos detalles del mentáu diariu y de les sos vivencies, nun busca reflexar exactamente la esperiencia personal de De la Concha, sinón que ye compendiu de la de tantes persones de diferente ideoloxía y nacionalidá que sufrieron la mesma vivencia traumática en mediu de cualquier guerra. La obra, más que la cuestión bélica, trata les contradicciones humanes nuna situación de presión emocional.

L’autor, Lluis Portal Hevia (Villaviciosa, 1964), tien publicaes abondes collaboraciones lliteraries y artículos nos últimos venti años. Ente los sos llibros tán ún de cuentos, Trófimo y Radamés, la biografía de Francisco Balbín, y el trabayu etnográficu Secretos de Pandenes. En cuantes a la producción dramática, tien escrito (a comuña con Miguel González) La pasión de Patatona y dos obres coles que ganó les dos ediciones del Premiu Uviéu, Oh 36! y Poison

.La compañía Syntexto Teatro naz en xunu del 2007 de la mano de dellos actores y actrices moces del valle’l Nalón. Dende entós tienen participao en bien d’alcuentros, feries y festivales de teatru amateur.