Sociedá

Música y quesos del país xúntense en Cualloto

Quesos asturianos.

El xueves 11 de marzu, a partir de les 20:30 hores, la sidrería Tierra Astur de Cualloto, va acoyer, un añu más, les xornaes englobaes col nome Asturies, el país de los 40 quesos; concretamente, esta va ser la octava edición.

Nesta actividá danse cita cuarenta variedaes de quesu producíes en tierres asturianes, que los visitantes van poder degustar. Ye una oportunidá única de poder prebar dalgún tipu de quesu ensin esplotación comercial y con una producción cásique casera del too. Ente les munches races de quesu alcuéntrense les mas conocíes, casu de lo de Cabrales, Afuega’l Pitu, La Peral, Los Beyos, Gamonéu, Porrúa o Ah.umáu de Pría; pero tamién otres muncho menos espardíes y que’l gran públicu desconoz mesmamente la so esistencia. Unos exemplos podíen ser lo d’Urbiés, Xinestosu, la Torta de Vidiago o lo de Peñamellera a la Sidra. Amás, tolos que s’averen hasta Cualloto pueden disfrutar tamién de La cocina de los 40 quesos, xornaes gastronómiques onde s’ufierten platos preparaos con delles de les modalidaes queseres asturianes.

El mesmu xueves, a partir de les 21:30 hores, l’ambiente musical van ponelu los componentes de la bandina tradicional Pelgares. Esta formación surde nel añu 2008 creada por músicos que vienen de dellos ámbitos de la cultura asturiana y que tán uníos por un sentimientu común: dar a conocer la música tradicional asturiana al traviés de la fiesta. Nesti sen, les sos actuaciones afalen a la xente pa que baille y lo pase bien. El grupu diose a conocer formalmente nel mes d’agostu d’esi añu nun actu que se celebró en Xixón por cuenta del Día Internacional de los Puebos Indíxenes. Tienen participao tamién na edición de 2009 d’Arte na Cai nel branu xixonés y en munches espiches y alcuentros diversos. Pelgares son Xosé Nel Otero Puente a la flauta travesera, Martín Fernández-Peña al acordión diatónica, José Martínez Álvarez a la guitarra acústica y voz, y Ángel Cuesta Piquero a la gaita.