Llibros

L’Academia de la Llingua reedita’l «Catecismu de 1916 en llingua asturiana»

Portada del llibru.

L’Academia de la Llingua acaba de facer llegar a les llibreríes del país una reedición del llibru Catecismu de 1916 en llingua asturiana, qu’editara nel so día’l Seminariu de Filoloxía Asturiana, concretamente nel añu 1981.

Tratábase d’un facsímil del llibru Los artículos de la Fé. Explicación breve y sencilla de los mismos en bable, una especie de catecismu publicáu nel añu 1916 pol presbíteru Luis Sánchez García. Nél va esplicando, de manera cenciella y n’asturianu, cuálos son los principales preceptos de la relixón católica.

El Seminariu de Filoloxía Asturiana, vinculáu a la Universidá d’Uviéu, activu de 1978 a 1983, entamó una xera que diba dende la organización de los primeros cursos de llingua asturiana nesa institución a la investigación, pasando pela estaya lliteraria, la pedagóxica y la de llibros vieyos.

Precisamente nesti últimu apartáu l’únicu llibru que publicó foi’l Catecismu de 1916 en llingua asturiana, qu’agora reedítase nun facsímil col prólogu firmáu pol, daquella, párrocu de La Pola Siero Carlos Sánchez Martino, y el «Piesllu» de Roberto González-Quevedo.