Música

Roddy Hart trai’l so folk-rock a Asturies

Roddy Hart.

El miércoles 10 de marzu, a les 20:00 hores, nel Centru Cultural Cajastur d’Uviéu, y el xueves 11 (tamién a les 20:00 hores) nel Pabellón Cajastur del Recintu Ferial Luis Adaro de Xixón, el músicu escocés Roddy Hart va dar dos conciertos. Éstos enmárquense dientro’l ciclu Música del sieglu XX; la entrada ye llibre y gratuíta hasta completar l’aforu.

Descritu como «ún de los secretos meyor guardaos d’Escocia», el cantante y compositor de Glasgow Roddy Hart convirtióse nuna de les grandes propuestes musicales emerxentes de la escena escocesa. Comparáu con Bruce Springsteen, Elvis Costello, Bob Dylan y Tom Petty, Hart ta consideráu como un artista clásicu qu’enllena el solu l’escenariu cola so voz magnífica, la so espresión sentida, el so pianu, la so guitarra y la so harmónica.

Roddy Hart tien fecho xires per Estaos Uníos, Xapón, España y Irlanda, y foi artista invitáu de Kris Kristofferson, Ray Davies, Jeff Beck, John Prince, Ray Lamontagne, Teddy Thompson, Rosanne Cash y Deacon Blue. Cola so banda, The Fire Ionesome, o a dúu xunto a John Martin (formatu nel que vien a Asturies), ta percorriendo Europa col so segundu discu, Sign language.