Música

La primavera va trayer novedaes discográfiques n’asturianu

La próxima primavera va trayer con ella l’aparición de delles novedaes discográfiques d’estilos estremaos que tienen a la llingua asturiana como protagonista.

El grupu ribesellanu Corquiéu va publicar el so tercer discu, col títulu de Suaña, onde siguen col so estilu claramente folk de carácter acústicu. De nuevo les pieces tradicionales van alternase coles composiciones propies, y la voz sigue col so protagonismu de la mano de Gema García. Destaca en dalgún qu’otru tema ciertu aire pop, que vien dao pola melodía y los estribillos pegadizos.

Los moscones Misiva tamién van ver editáu nes próximes selmanes el so segundu trabayu, tituláu Parte de la solución. Nél van incluír les cinco canciones yá publicaes nun discu anterior (pero grabaes otra vuelta) más otres cinco nueves. L’estilu d’estos cuatro músicos inxértase nel punk-rock y el hardcore melódicu, na onda de les bandes norteamericanes. Esti trabayu va presentase nun formatu billingüe con un discu n’asturianu y otru en castellanu.

P’acabar, los mierenses Skanda van sacar la so quinta entrega discográfica tamién nesa temporada. Asina, col títulu de Folk’n’roll circus, van dar a conocer les sos composiciones nueves, con muncha mayor presencia de los temes cantaos (cásique toos) y na llinia folk-rock avezada nellos.