Música

Los Premios AMAS 2010 axuntaron la escena musical asturiana

Premios AMAS.

El vienres de la selmana pasada facíase nel Teatru Filarmónica d’Uviéu la gala d’entrega de los Premios AMAS 2010, nos que se reconoz el trabayu de los intérpretes asturianos. Nel teatru diéronse cita munchos de los protagonistes de la escena musical asturiana qu’enllenaron toles sos butaques.

Ente los gallardonaos destacaron Muñecu Vudú, que llograron tres premios (Grupu Revelación, Canción Rock y Otros Instrumentos), Dixebra con dos (Meyor Discu Rock y Meyor Diseñu) y Alfredo González con otros dos (Meyor Teclista y Meyor Canción Otres Escenes). Tamién resultaron premiaos, ente otros, Spanta la Xente (Meyor Canción Folk), Pablo Moro (Meyor Discu Otres Escenes), Xera (Meyor Discu Folk) o Martín Poladura (Gaita).

Amás entregáronse tamién dos premios honorificos, ún al productor Pedro Bastarrica, fallecíu hai unos años y pioneru na creación d’infraestructures musicales n’Asturies; y otru al cantante y guitarrista Jorge Martínez, qu’esti añu desfái la so banda, Ilegales, pa dedicase dafechu al so proyectu nuevu, Jorge Ilegal y los Magníficos.

Otra manera, yá ta na cai una entrega nueva de la publicación Anuario de la Música en Asturias, que recueye nes sos páxines bien d’información sobre l’actividá xenerada pola escena musical del país a lo llargo del añu 2009. Acompáñase d’un cedé resume de les grabaciones discográfiques de los grupos asturianos y d’un DVD con dellos video-clips.