Sociedá

El Conceyu de Ribesella convoca’l Premiu Arbidel de rellatos eróticos

El Conceyu de Ribesella acaba de convocar la tercer edición del premiu Arbidel de rellatos eróticos en llingua asturiana. Los orixinales, han tener, polo menos, ocho fueyes mecanografiaes a doble espaciu per una cara y pueden presentase hasta'l próximu 20 d'abril na mesma Casa Conceyu. Les bases contemplen dos premios, ún de 1.200 euros y otru de 500.

Los trabayos que lleven el premiu van publicase próximamente nun volume que va incluír los cuentos gallardonaos nestes trés primeres ediciones. Les bases del concursu pueden consultase na páxina web del Conceyu de Ribesella.

Na primer convocatoria d’esti premiu de cuentos eróticos resultó ganador l’escritor Xosé Nel Riesgo cola obra «De bandera», mentes que l’accésit llogrólu David Rivas con «Boedica y Doña Nuria».

L’escritor candasín David Artime Coto foi’l ganador de la segunda edición del concursu lliterariu Arbidel de cuentos eróticos en llingua asturiana. La narración vencedora llevaba de títulu «Ella y Ariel». Per otru llau, el xixonés Pablo Rodríguez Alonso llograba l’accésit con «El confesor». Esti certame ta entamáu pol Conceyu de Ribesella, y enmárcase dientro de les actividaes de la Selmana de les Lletres Asturianes.