Música

El ciclu «Uviéu Tierra Folk» acueye la presentación de dellos discos

1er. Ciclu Uviéu Tierra Folk.

El primer Ciclu de Conciertos Uviéu Tierra Folk va valir pa presentar en directo dellos trabayos discográficos nuevos recién salíos al mercáu y actuaciones de grupos, too ello centrao nel folk.

El sábadu 20 de marzu, a les 20:30 hores, principia esti ciclu cola actuación de Verdasca, que presenta’l so discu nuevu, tituláu D’abéu. Ye la primera de les cuatro actuaciones que van facese nel Teatru Filarmónica d’Uviéu. El 3 d’abril sigue l’Uviéu Tierra Folk col grupu cántabru Vallarna, que va presentar Km. 90. Los Ciquitrinos actúen el 10 d’abril, y ciarren les xornaes musicales, Corquiéu, presentando’l so trabayu nuevu, que va aparecer d’equí a poco, col títulu de Suaña. Tolos conciertos son a les ocho y media de la tarde.

Les entraes viéndense a 7 euros a partir del día 18 de marzu nes taquilles del Filarmónica y del Campoamor y na rede de Caxastur. El bonu pa los cuatro conciertos del Ciclu tien un preciu de 20 euros (del 8 al 17 de marzu). L’actu organízalu Producciones Tierra y la Sociedá Uviedina de Festexos, en collaboración con Les Noticies.