Música

Llangréu va acoyer el II Pollution Fest

Cartel del II Pollution Fest.

El sábadu 13 de marzu, a partir de les 20:00 hores, nel Club Xuvenil de Villa, va celebrase la segunda edición del Pollution Fest, entamáu pola asociación cultural Llangréu Suena. Nél van participar les bandes Cinder, Misplace, Adrenalized, Mr. Lafleur, The Baseball Furies y Acid Mess.

Formaos nel 2001 en Barcelona, Cinder ye un nome importante dientro de la escena hardcore. Dende’l so surdimientu, nun pararon d’editar trabayos y xirar per tol mundu, delles veces per América Llatina. Los autores del cantar «Nacer y morir en el pit» van desfacese depués d’acabar la xira actual que los trai a Asturies.

Nacíos tamién nos primeros años d’ésta década, los burgaleses Misplace y los donostiarres Adrenalized visiten Llangréu nesti II Pollution Fest. Punkrock y hardcore ye l’estilu de Misplace, banda que nel 2009 llanzaron a la cai’l llarga duración Cada vez más fuerte, editáu nel Estáu español por Fragment Records y en Xapón por HSF Records. Adrenalized, pela so parte, lleguen dende Donosti a ritmu de hardcore melódicu; Droer it now ye’l so trabayu nuevu.

Los grupos asturianos nun podíen faltar nesti eventu musical, y pel escenariu del Club Xuvenil de Villa tamién van pasar Mr Lafleur, The Baseball Furies y Acid Mess. Éstes tres formaciones son de creación recién dientro’l hardcore asturianu pero, caúna cola so propuesta personal, van llogrando un sitiu nos conciertos y festivales d’esti tipu.