Sociedá

La celebración institucional del Día Internacional de la Muyer va facese en L.luarca

Cartel del 8 de marzu.

L’actu institucional del Día Internacional de la Muyer va desendolcase’l llunes 8 de marzu na capital del conceyu de Valdés, L.luarca. El programa inclúi bien d’actividades, dalgunes d’elles puestes en marcha en collaboración con conceyos asturianos y centros educativos.

L’Auditoriu del Conservatoriu Profesional del Occidente d’Asturies va acoyer l’actu, que va escomenzar a les 17:30 hores cola presencia del Presidente del Principáu d’Asturies, Vicente Álvarez Areces; la Conseyera de Presidencia, Xusticia y Igualdá, María José Ramos; y l’alcalde de Valdés, Juan José Fernández Pereiro, ente otros. Como n’años anteriores, les palabres institucionales van compartir espaciu con otres voces de la sociedá. Nesta ocasión, al traviés de María Berdasco Menéndez, (investigadora científica especializada n’Oncoloxía Molecular del Institutu d’Investigación Biomedica de Bellvitge), José Ignacio Nieto García (director del Institutu d’Enseñanza Secundaria Carmen y Severo Ochoa de L.luarca) o Elena Badallo León (coordinadora sociosanitaria del Área Sanitaria I).

Va facese alcordanza tamién de dos valdesanes mui especiales: la poetisa Nené Losada y la bioquímica del Conseyu Superior d’Investigaciones Científiques, Margarita Salas, que va dirixir unes palabres a toles persones asistentes nuna entrevista grabada.

L’actu va incluír delles actuaciones musicales, ente elles la interpretación de delles piezes musicales a cargu del alumnáu del propiu Conservatoriu Profesional del Occidente d’Asturies, la del grupu de música fusión Delagua y la cantante de tonada asturiana Mari Luz Cristóbal. Amás, va contase cola actuación de la trapecista Laura Bolón, que va reproducir unes escenes del so espectáculu Inmuyerable.