Llibros

Piloña entama’l III Concursu de Narraciones Curties n’Asturianu

Casa Conceyu de Piloña, en L'Infiestu.

Yá ta convocáu'l III Concursu de Narraciones Curties n'Asturianu Conceyu de Piloña, col que se quier contribuír a la normalización llingüística y a la promoción del conceyu. Esti concursu, patrocináu pola Conseyería de Cultura del Principáu, Caja Rural y el periódicu El Fielato, tien l’oxetivu de potenciar la imaxinación y la creatividá de los ciudadanos, recuperar la sensibilidá pola llingua materna y publicar rellatos asturianos, de carácter modernu o tradicional, y ta abiertu a toles persones que quieran participar.

Los trabayos han tener ente tres y cinco folios, y presentase na Casa la Cultura de L'Infiestu, enantes del 12 de xunu, en dos sobres zarraos. Nún tien que dir el trabayu por triplicao; y nel otru, los datos del autor y un númberu de teléfonu de contactu.

El fallu del xuráu va dase a conocer los primeros díes del mes de xunetu y la entrega del premiu va facese'l 16 de xunetu, na Casa la Cultura de L'Infiestu, a les 20:00 hores. El primer premiu ta dotáu con 1.000 euros y el segundu, con 700 euros.