Cine, teatru y TV
La obra de danza-teatru «Idiotas», a escena en Xixón
Escena d'Idiotas.
El sábadu 6 de marzu, a les 20:30 hores, va ponese n’escena
nel Teatru de la Llaboral en Xixón la obra Idiotas, del
coreógrafu Tomeu Vergés.
Unos minutos basten pa qu’Idiotas, con
una coreografía pa cinco baillarinos, faiga’l so efectu. Una sonrisa plácida,
un aquello tonta, asoma nos llabios del espectador. Esti reflexu d’una
satisfacción misteriosa ye prestosu, raru de sobra como pa confirmar l’éxitu
d’esta pieza incongruente. Más que’l conteníu, ye’l xuegu maliciosu de los
intérpretes, l’atmósfera amablemente fata d’esti patiu de recréu p’adultos
descerebraos o que fai correr un respigu de placer y
complicidá.
El coreógrafu Tomeu Vergés, creador de la compañía Man
Drake en 1992, escoyó rise de les sos pulsiones mortíferes optando pola vía de
la sabiduría y la filosofía. Cola influencia de la película Simón del
desierto, de Luis Buñuel, y del llibru Les Hommes ivres de
Dieu, de Jacques Lacarrière, Idiotas refuerza
tamién la so danza-teatru personal. L’equilibriu perfectu ente la invención
xestual y el sentíu fondu del movimientu dan como resultáu encadenamientos de
pasos llamativamente esplícitos. Esta obra propón reflexonar sobre la idiotez
como oposición a la sensatez, y nella xuégase con aspectos prestosos, cómicos,
que de secute tresfórmense en situaciones tráxiques. La interpretación cuerre a
cargu de Julien Fouché, Marc
Lacourt, Sandrine Maisonneuve, Alvaro Morell y el propiu Tomeu Vergés.
