Arte
Llaboral inaugura la so Mediateca
Mediateca_Archivu de Llaboral.
La
conseyera de Cultura, Mercedes Álvarez, inauguraba esta selmana la Mediateca_Archivu
de Llaboral. Esti serviciu nuevu del Centru d’Arte dispón d’un espaciu de 165
metros cuadraos y va centrase na investigación y promoción del arte y la creación
industrial contemporáneos.
L’usu y
accesu son llibres y el públicu pue consultar tou tipu de recursos lligaos a la
creación actual y les industries culturales esperimentales. La distribución
d’espacios y concepción del moblame de la Mediateca_Archivu son responsabilidá
de l’arquitecta asturiana radicada en Milán Patricia Urquiola. La sala cuenta
con 18 puestos de llectura y consulta, y ocho puestos multimedia. La Mediateca
de Llaboral tien, amás, un programa d’actividaes propies que va escomenzar el
vienres 5 de marzu, con un ciclu de conferencies que va tratar la producción de
les últimes xeneraciones d’artistes asturianos y va siguir, los díes 28 y 29 de
mayu, col simposiu internacional Mediateques y Archivos pal sieglu XXI.
Los fondos
de la mediateca de Llaboral analicen los puntos d’alcuentru ente arte,
tecnoloxía, ciencia, sociedá y industria, siguiendo’l modelu d’otros centros de
referencia en cuantes a interacción ente públicu y arte, como la mediateca de
la Caixa en Barcelona o’l ZKM de Karlsruhe.
