Música
Los Alcuentros de Música Contemporánea inaugúrense con una actuación d’Ensemble Neopercusión
L'Ensemble Neopercusión.
El vienres 5 de marzu (18:30 hores) inaugúrense los Alcuentros de
Música Contemporánea con una actuación d’Ensemble Neopercusión en Llaboral
Ciudá de la Cultura, na que van interpretar Persephassa, Okho
y Psappha, del compositor griegu Iannis Xenakis. Amás del
repertoriu de Xenakis, les obres del italianu Luigi Nono y del alemán Klarheinz
Stockhausen van articular los conciertos, onde tamién va sonar el repertoriu
más recién de los compositores españoles, incluyendo la estrena absoluta de Paesaggio
di luna fredda, del asturianu Carlos José Martínez, y Los
niños han gritado, de Jorge Fernández Guerra.
Los músicos d’Ensemble Residencias, formáu pol Trío Arbós y
Neopercusión, amás del Cuarteto Diotima, van participar nestos conciertos,
aparte de solistes internacionales como la sopranu Alda Caiello, el flautista
Roberto Fabbriciani y Bryan Wolf, inxenieru de soníu de
Stockhausen.
El panorama d’actividaes tamién inclúi un ciclu de conferencies sobre
música y arquitectura nel que se van tratar dellos de los aspectos
fundamentales que conecten les dos disciplines, como la tresformación de la
música electrónica en directo o los proyectos multimedia d’arquitectura sonora.
Amás, los Alcuentros ufierten un proyectu pedagóxicu ampliu cola puesta
en marcha d’un taller de creación d’espacios sonoros dirixíu a compositores,
artistes sonoros y al públicu interesáu; un taller instrumental sobre la flauta
y el clarinete; y dos talleres infantiles y xuveniles de creación de paisaxes
sonoros de Xixón y d’arquitectura acústica.
Los Alcuentros de Música Contemporánea complétense con dos esposiciones
monográfiques sore la visión especial de la música de los compositosres Isnnis
Xenakis y Luigi Nono y dos instalaciones sonores, Gardens of
Music yEl espacio que canta, de Miguel Ángel Fernández.
L’accesu a toles actividaes ye gratuítu.
