Música

La cantante canaria Rosana actúa en Xixón

Rosana.

Rosana va presentar el so últimu trabayu discográficu, A las buenas y a las malas, nel marcu del Festival de la Palabra del Teatru Xovellanos de Xixón, el vienres 5 de marzu a les 20:30 hores.

Nacida na isla de Lanzarote, ye la pequeña d’una familia d’ocho hermanos. A los 20 años treslládase a Madrid, onde estudió harmonía y guitarra. Anque lleva más de 10 años enriba los escenarios, la so carrera musical principia muncho enantes, componiendo canciones pa otros artistes. Foi xustamente nel añu 1996 cuando decide cantar ella mesma los sos propios temes y publica’l so primer álbum, tituláu Lunas rotas, un discu qu’algamó una proyección inesperada ensin querelo y que convirtió en tou un fenómenu; la so entrada na llista de superventes foi la más fuerte d’un artista nuevu na historia de la música nel Estáu español.

El director cinematográficu Quentin Tarantino utilizó dos temes compuestos por Rosana na película Curdled. La so música tien muncha sonadía en toa América Llatina, lo que fai que sían yá vezu les sos xires per tou aquel territoriu.

N’abril del 2009 Rosana edita’l so trabayu discográficu nuevu, A las buenas y a las malas, quintu discu d’estudiu, producíu por ella mesma. Como n’anteriores trabayos, ye la compositora de la lletra y la música de toles canciones. Nesta ocasión participa inda más como instrumentista. Ye un discu con aires más rockeros que los sos primeros discos. La presencia de les guitarres faise más evidente y garren mayor protagonismu. Les lletres tienen un carácter más comprometíu y una carga social importante. Nesta xira de presentación ta acompañada d’una formación compuesta por Javier Quilez al baxu, Joaquín Migallón a la batería y David Pedragosa a les guitarres.