Cine, teatru y TV

Caracol Teatro representa «Caperucita Roja»

Cartelu de la obra "Caperucita".

El xueves 4 de marzu, nel CMI Atenéu La Calzada (18:00 hores), la compañía Caracol Teatro representa la obra Caperucita Roja. Trátase d’una propuesta inxenua y desenfadada del cuentu clásicu, un xuegu d’improvisación y participación. Propón l’alcuentru con personaxes conocíos como Capiellín coloráu, la neña llista que siempre sabe’l testu, el llobu despistáu, olvidadizu y bonu que se dexa llevar, la güela amalicada, el doctor que cura los males y un policía vixilante del orde y, por supuestu, Carlitos, el presentador y amigu de Capiellín.

Caracol Teatro equilibra con xeitu’l trabayu pedagóxicu cola producción d’espectáculos. Dende la so fundación en 1998 tien creao dellos espectáculos de títeres con técniques de filu, guante, mesa, bunraku, bocones, varines, solombres, etc. Fai actuaciones con espectáculos de títeres, cuentos o animaciones n’espacios esteriores y interiores. Participó en bien d’espacios narrando, contando, cantando, animando cuentos, con técniques variaes: oxetos animaos, proyecciones, pictorames, xestuales, orales… Nel campu pedagóxicu tuvo presente en munchos talleres, cursos, charles y dirixó espectáculos pa neños, rapazos, adultos y persones mayores, dientro d’actividaes estraescolares y d’ociu y tiempu llibre, amás d’en programes curriculares escolares o programes interxeneracionales.