Música

El ciclu «Música del sieglu XX» presenta en Xixón la música d’orquestina

Diego Galaz y Carlos Beceiro.

El xueves 4 de marzu, a les 20:00 hores, nel Recintu Ferial Luis Adaro de Xixón, dientro del ciclu Música del sieglu XX de Cajastur, va actuar el dúu formáu por Diego Galaz y Carlos Beceiro.

Diego Galaz (componente de La Musgaña, Mastretta y collaborador de Jorge Drexler, Pasiñon Vega, Luis Delgado y Revólver) xunto a Carlos Beceiro (fundador de La Musgaña y collaborador de munchos artistes del panorama world music estatal y internacional) preséntennos esti dúu sorprendente. El so repertoriu ta formáu por melodíes populares del Estáu español, coles que les xeneraciones pasaes baillaben y festexaben grandes acontecimientos. Cola estética de les orquestines de principios del sieglu XX, y con unos arreglos ellaboraos con procuru, estos dos músicos dan forma a melodíes que yá pertenecen a la banda sonora de la nuestra vida. Con instrumentos poco avezaos como’l violín trompeta, el serrruchu o la gaita rabil, l’espectáculu Bailes vespertinos ye una mezcla de ritmu, melodía y soníos mui orixinales que nos tresporten a esos díes en que la radio facía disfrutar de momentos musicales inolvidables.

Diego Galaz toca’l violín, violín trompeta, guitarra, mandolina y serruchu, mentes que Carlos Beceiro encárgase de les guitarres, les mandolines, la gaita rabil y les percusiones. La entrada al conciertu ye llibre y gratuíta hasta completar l’aforu.