Cine, teatru y TV

La ESAD pon n’escena la obra «Noche de Reyes (o lo que queráis)» de Shakespeare

Cartel anunciador.

Un añu más, la Escuela Superior d’Arte Dramáticu (ESAD) sal de les aules pa ufiertar al públicu asturianu’l so taller fin de carrera. Ésta ye la quinta promoción saliente de magar s’imparten n’Asturies unos estudios de grau superior. Los talleres de 4u. cursu son l’averamientu a la profesionalización del alumnáu con un trabayu y unes condiciones asemeyaes a les de cualquier compañía profesional. Van ser cinco los teatros onde va poder vese l’espectáculu, tituláu Noche de Reyes (o lo que queráis), basáu nuna obra de Willian Shakespeare; éstos concretamente van ser: Teatru de la Llaboral de Xixón (3 de marzu a les 20:30 hores), Teatru Riera de Villaviciosa (5 de marzu a les 20:30 hores), Teatru Palacio Valdés d’Avilés (9 de marzu a les 20:15 hores), Teatru Nuevu de La Felguera (10 de marzu a les 20:15 hores) y Teatru El Llar de Corvera (12 de marzu a les 22:30 hores).

Col títulu de Noche de Reyes y tamién col de Noche de Epifanía traducióse tradicionalmente la obra Twelfth Night or What You Will (La duodécima noche o Lo que queráis). Esta comedia en cinco actos y en versu y prosa escribióse hacia los años 1599-1600, pue que se representara la nueche de la Epifanía del 1600 y se publicara nel infoliu en 1623. Noche de Reyes, escrita nel mesmu periodu que Hamlet y Troilo y Crésida, comparte con elles los temes de la muerte, l’erotismu y la identidá, pero nun xira alredor de la crueldá y la pérdiga: avanza con optimismu hacia l’autodescubrimientu y la realizacion. Mantién un tonu xeneral de comedia bufa, enllena de personaxes estravagantes. Ente los personaxes, dellos son tipos fixos, animaos pola maestría shakespeariana, como’l duque d’Orsino, namoráu del amor, señardosu y melgueru, el clásicu dolíu, o la condesa Olivia, tamién una sentimental, pero la figura de Viola ye la gran creación d’esta obra.