Música

El músicu cubanu Alain Pérez actúa en Xixón

El miércoles 3 de marzu, a les 20:00 hores, nel Centru de Cultura Antiguu Institutu de Xixón, dientro del ciclu Conciertos del Taller, va actuar Alain Pérez. La entrada ye llibre y gratuíta hasta completar l’aforu.

El músicu y instrumentista cubanu Alain Pérez ye bien conocíu ente los aficionaos a la música llatina pol so trabayu xunto a estrelles como Chucho Valdés, Irakere, Isaac Delgado, Paquito de Rivera o Celia Cruz. Dende’l so afincamientu nel Estáu español, amplió los horizontes musicales al mundu del flamencu y  collaboró con Enrique Morente, Diego El Cigala, Niño Josele y, mui especialmente, Paco de Lucía, que-y encomendó la dirección musical de la so xira próxima.

Nesti conciertu va presentar la so faceta más personal como compositor y cantante, y va ufiertar en primicia les sos creaciones incluíes nel so discu recién publicáu, Apetecible, onde combina amañosamente los raigaños de la musica afrollatina col duende flamencu, l’espíritu jazzísticu col descaru del pop cubanu. La banda va tar formada por Alain Pérez (voz y baxu), José Rivero (pianu), Dayan Abad (guitarra) y Georvis Pico (batería).